Dotarica - Ankica Piasevoli

Ankica Piasevoli Sali, Dugi otok

DȌTARICA

- I danas se jos povȋda
da je vȅla dȍtarica bila.
Bas sȁn kurijȏza znati.
- Sȅdi vȕde pa ću ti sve nabrajȁti.
Neću ništa zventȁti.
More biti da ću čakȍli priskoćȉti,
ali neću nažuntȁti,
jerbȍ nima nȏga ća se ni sȉtila parićȁti.
Po redu ću ti povidȁti:
pȍnila je duzȋnu velih lancȗnov;
o njih šest gornjih rekamȃnih.
I šest o pršȏne, mȃlih.
Dvi duzȋne intimȇl, stȅšo rekamȃnih
i z mȅrlićima inkašȃni.
Četȉre kušȋna o vune.
I pijumȋn o perušȉne.
Imbotȋdu o svȋlnoga bumbȃka
i dvi nȁvlake da se ne šporkȃ.
Valȇnce tri o domȃće vune fȋne,
i dvi ščavȋne z butȋge.
Dva kuvertȗra:
kupȏvni črljȅni i o bȇloga bumbȃka pletȅni.
Dvi tȁvaje bȇle i dvanȁjst tavajȏlov.
Čȕdo facolȉćov mȃlih i velih,
kanavaȃc i kuhinjskih štrȃc.
Šugamȃnov dvȁjse o špȕnje
i bȇlih na stȉnji i na svima ime.
Dȅse mȃj suknȅnih i peȇ prtȅnih.
Trȅse pȃri bȉčav pletȅnih:
dvȃjse o vune očvr̄ljȅnih,
a dȅse o bȇloga bumbȃka.
Ki bi je se u to tȁka!
Bolje bi bilo u tabrnȃkul!
- Znan, znan, došlo bi do ćȁkul.
I ȕnda, ča jošćȇ?
- Pȍdveze cerne i bele o kurdȅle
za bičve veživȁti,
i ligȃmbi o lȁštika,
ki je nećeju noge stiskȁti.
Dȏnjih fuštȃnov o fuštȁnja
i madrepolȁma, pȑko dvȁjse.
I tri suknje kȃne , ništa manje.
Pȇ fuštȃnov gornjih o kambrȉka, za sȃvdan;
dva o vune za blȃvdan:
Četire o tȉbita i šatȇna
crnih kako mȗrva, ni mȉga, bȅna.
Duzȋnu travȅras za posaȃl;
o cȉca i šatȇna, a četiri o vune
modre kako mȏre i po njima luzȃri.
Toliko i facȏlov za glavu,
svih kolȗrov i cvȇtov zšȃranih.
I tri svȋlna za prko ramȅn,
s dugȁškin stȋnjima malo zgȍr kolȇn.
Dva faceletȗna kupljȅna,
i tri pletȅna, u tri kolȗra črvljȅna.
Dvi šjȃlpe i na cepȅlu šlape,
za po kući capelȁti.
Mudȁnat svake šȏrte:
na kurdȅle za kolo pȃsa veživȁti
i otvorene zdȏla da se mȍre žveltȉje posrȁti
i inpȉje popišȁti;
dȕgaških i krȃtkih,
o fuštȁnja i madrepolȁma, da bi trȅse.
- Dobro cu gujȉcu stepliti.
Ča mi imaš jošćȅ povȋti?
- A ča, ćȗti pa ćeš čȕti:
Košȗlj belih rekamȃnih,
dugaških i krȃtkih, ki bi pobroji.
Blȗž o tȉbita i cȉca za saȃvdan,
a svȋlnih i o velȕda za blȃvdan,
vȉšje nego fuštȃnov.
Kapotȋn o pȁna i buštȉne za cȉce držȁti,
prfȋn i ubȏjci ko je bude volja kopȁti.
Postȍlov basȅtih i na tȁci o kože i laka,
pe-šest pari kako principȅša.
Šuperbȁča, drži se, kako madrēbadȅša!
Škarpȉnov novih tȅker kurdelȃnih.
Nis ih brojila, na dno kȍfe ih je zabȉla.
Nȋ je to bilo dosta, kako da je bȗska
i da ima sto nog, nakrcȁla je u sakȅtac:
bȋgulice za poplȁti, nȁplate tri kvadrȅla,
za novi škarpȋni činȉti i ȕsanja za škofȗni pošivȁti.
Prtrȅsla je cȇlu kucu i vazȅla
muškȏ i žȅnsko kopȉto za činiti obȕću.
Čȕdo bjankarȉje i robe pȑtene
ponile su je divojke napȑćene.
Trȅse kȏf su na glavȁmi nosȉle,
kako da su z tȑganja hodȉle.
- Ča si fermȁla, oli ni više čȃ imala?
- Da imala? Ćȗti:
Dva tapeȅja kȃna na mȍdre i črljȅne rȋge.
I jenȏga dugaškȍga z kraja na kraj kȁmare,
novoga z butȋge.
- Govori se najvȉšja dȍtarica dosȅle.
- Je! Je, je moja sȇle, još imaš ča čuti:
Kolȃjnu o zlata za tri puta kȍlo vrȃta.
Vitȉcu i tri prstena zlȃtna.
Puntapȅt, brunculȅt , ča je je dala sȃntula o Grada.
Rećȋni z pȉnduljima za se naprlitȁti,
i moretȉne za uši probijȁti.
Dvi kȁnice kȃne, svaka drugih kolȗrov,
Duzȋnu žmȗlov.
Kudȉlju , bretenȃ, prsukovȁlo, kanȏl za zȁpas zadȉti,
ka pletȇ na igle debele i tȃnke, kih ni zaboravila vȑći.
Kartȅlicu ȋgal mȃlih i velih, kvadrenjȁču i šȉlo
(u gujȉcu je se dobȏvda zabȉlo).
Žȋžjal, drȅtve i vȍska za pošivȁti.
Ma ki će sve znati?
Dvanȃjst rokȅlov konca crnoga i bȅloga za na ruke
i za na mȁkinu šiti, mogla bi šalturȉca biti.
Çȅse maceȇt bumbaȃka, dvȃjse kudȉljic vune,
bȇle, sȗre i cȑne.
Svake šȏrte gomeȅtulov za rekamivȁti,
da ima čȃ činiti ka se s polja vȑne.
Mȁkinu za šiti na ruke,
a mȍre ju i na noge impjantȁti.
Tri ȍvčine žive i sȅdan ubijenih za pir.
To još niko ni vidi živ.
- Tolika ingordȋžija?
- Pokupila je i čavli z kuće,
a dȍmaka su ostali prez obuće.
Sa ćuti vȍ:
Njivu u polju i dvȃjse stȗpov.
- Ma ča mi govoriš?
- Particȅlu na Grpȃšćak i drvȃšćak.
Kosȋr za brime i kiće brati.
Spȁru šȃru o kȑpic za na glavu
kȁbli vode nositi i drugu o suknȅne bičve
za spo brimeȇn vȑći.
Komȍ bȁso na četire kašȅte
i visoko na šest za bjankarȉju uštivȁti.
Ćȉkarice vele i male za na komȍ poštivȁti.
Štrȉke rekamȃne za na komȍ i škabȅli.
Koltrȋne za na cȁkla,
I vele za bonegrȁcije, do tlohȁ.
Baȗl i skrȉnju za suknenu robu držȁti.
Moraće ih u kamarȋn kacȁti.
Pȍnila je i bȃnčić za u crikvu,
prfȋn i svoju zikvu,
a ki zna će li dice imati.
Sekȑva je parićȁla armerun i škabȅli,
koćȅtu bašćȃnsku i pajarȉcu,
kozice o janjcov za pod dicu.
Štramcȉ o vune, vȑčinu, kȃin i brȍku
o majȍlika, na levamȃnu.
- Ja ti kȃžen da će imati dobrȋn kȁmaru prkrcȃnu.

Sale, na Dan sv. Ane 1994.

MANJE POZNATE SALJSKE RIČI U DȌTARICI: banCic mala niska drvena klupica bail! - drveni sanduk za drzanje rublja ben a - glupak, budala b'igulica - juneca stavljena koza za potplate bjankarlja - rubenina , posteljina bonegrlkije - nosac zavjesa branculet - narukvica broka - posuda za cistu vodu na umivaoniku buska - smrdljiva stonoga bust'ina - starinski zenski prsluk cape Ia - potpetena obuca ( capelati) de - vrsta tankog platna crvljeno - obojeno Cikarica - salica za crnu kavu drvascak - konop za drva faceletlin - veliki vuneni sal fustan - naborana starinska suknja fustanj - vrsta platna, flanel gometul - klupko konca imbot'ida - poplun, jorgan inkasano - umetnuta Cipka kroz jastucnicu intimela - jastucnica ka'in - Javor, umivaonik kamara - soba kamar'in - sobicak kambrlk - pamucno platno dizajnirano kanavaca - kuhinjska krpa kanica - otkani pojas od vune kan61 - drveni drzac igle za pletenje kapot'in - zenski kratki kaputic klce - posjeceno zeleno granje za stoku koceta - bracni krevet (bascanska postilja) kolajna - Iancic, ogrlica koltr'ine - zavjese , zastori komo - komoda , onizak ormar za rublje kos'ir - mala , rucna zaobljena sjekirica kozica - suha janjeca kozica kucfiljica - smotana ocesljana vuna za predenje kurdela - vrpca kurdeJati - obrubiti vrpcom kus'in - jastuk kvadrenjaca - velika igla sa sirokim usicama levaman - umivaonik Iancun - plahta ligambi - podvezice za carape od Iastika luzari - ruze , cvjetovi madrebadesa - priorica samostana madrepolam - tanko svilenkasto platno mad ta smotak, namotaj majolika - porculan, keramika rna kina - sivaCi stroj merlic - Cipka m'iga - uzreCica: niposto moretlna - nausnica s likom crnkinje mudante - gace , gaCice naplata - stavljena koza za gornji dio obuce naprlitati - iskititi , uresiti nazuntati - nadodati, dodati ocrvljeno - obojeno pajar'ica - slamarica paricati - spremiti particela - parcela , cestica perusine - perje pijumln - pokrivac od perja , pe rina p'indulji - privjesci podveze - vezice za cara pe prfan - cak principesa - princeza principesa - princeza prsukovalo - vreteno za sukanj e vune prs6na - jedna osoba (misli se na krevet) prteno - platneno , pamucno punta pet bros rekam - izraden vezom renclni - nausnice rokel - kalem konca santula -kuma spara - podmetac na glavi za nosenj e tere ta stlnji - koncani privjesci saltur'ica - krojacica sa ten - saten, crna tkanina za fustane scavlna - mekani vuneni pokrivac sjatpa - sal, plet skarplni - domaca obuca spunja - frotir skabel - nocni ormaric stramac - madrac str'ika - izradeni podmetac, za stolice i ormarice (stolnjak) superbaca - oholica , gizdava , uznosita t'ibit - tibet crno platno za fustane traversa - pregaca ubojci - seljacka obuca prisivena na vunene carape usanje - stavljena koza za potplate ( od vola) valenca - gunj , vuneni tkani pokrivac vitlca - vjencani prsten , vera vrcina - nocna posuda zizjat - naprstak zvelto - hitro , brzo