Dotarica - Ankica Piasevoli

Ankica Piasevoli Sali, Dugi otok

DȌTARICA

- I danas se jos povȋda
da je vȅla dȍtarica bila.
Bas sȁn kurijȏza znati.
- Sȅdi vȕde pa ću ti sve nabrajȁti.
Neću ništa zventȁti.
More biti da ću čakȍli priskoćȉti,
ali neću nažuntȁti,
jerbȍ nima nȏga ća se ni sȉtila parićȁti.
Po redu ću ti povidȁti:
pȍnila je duzȋnu velih lancȗnov;
o njih šest gornjih rekamȃnih.
I šest o pršȏne, mȃlih.
Dvi duzȋne intimȇl, stȅšo rekamȃnih
i z mȅrlićima inkašȃni.
Četȉre kušȋna o vune.
I pijumȋn o perušȉne.
Imbotȋdu o svȋlnoga bumbȃka
i dvi nȁvlake da se ne šporkȃ.
Valȇnce tri o domȃće vune fȋne,
i dvi ščavȋne z butȋge.
Dva kuvertȗra:
kupȏvni črljȅni i o bȇloga bumbȃka pletȅni.
Dvi tȁvaje bȇle i dvanȁjst tavajȏlov.
Čȕdo facolȉćov mȃlih i velih,
kanavaȃc i kuhinjskih štrȃc.
Šugamȃnov dvȁjse o špȕnje
i bȇlih na stȉnji i na svima ime.
Dȅse mȃj suknȅnih i peȇ prtȅnih.
Trȅse pȃri bȉčav pletȅnih:
dvȃjse o vune očvr̄ljȅnih,
a dȅse o bȇloga bumbȃka.
Ki bi je se u to tȁka!
Bolje bi bilo u tabrnȃkul!
- Znan, znan, došlo bi do ćȁkul.
I ȕnda, ča jošćȇ?
- Pȍdveze cerne i bele o kurdȅle
za bičve veživȁti,
i ligȃmbi o lȁštika,
ki je nećeju noge stiskȁti.
Dȏnjih fuštȃnov o fuštȁnja
i madrepolȁma, pȑko dvȁjse.
I tri suknje kȃne , ništa manje.
Pȇ fuštȃnov gornjih o kambrȉka, za sȃvdan;
dva o vune za blȃvdan:
Četire o tȉbita i šatȇna
crnih kako mȗrva, ni mȉga, bȅna.
Duzȋnu travȅras za posaȃl;
o cȉca i šatȇna, a četiri o vune
modre kako mȏre i po njima luzȃri.
Toliko i facȏlov za glavu,
svih kolȗrov i cvȇtov zšȃranih.
I tri svȋlna za prko ramȅn,
s dugȁškin stȋnjima malo zgȍr kolȇn.
Dva faceletȗna kupljȅna,
i tri pletȅna, u tri kolȗra črvljȅna.
Dvi šjȃlpe i na cepȅlu šlape,
za po kući capelȁti.
Mudȁnat svake šȏrte:
na kurdȅle za kolo pȃsa veživȁti
i otvorene zdȏla da se mȍre žveltȉje posrȁti
i inpȉje popišȁti;
dȕgaških i krȃtkih,
o fuštȁnja i madrepolȁma, da bi trȅse.
- Dobro cu gujȉcu stepliti.
Ča mi imaš jošćȅ povȋti?
- A ča, ćȗti pa ćeš čȕti:
Košȗlj belih rekamȃnih,
dugaških i krȃtkih, ki bi pobroji.
Blȗž o tȉbita i cȉca za saȃvdan,
a svȋlnih i o velȕda za blȃvdan,
vȉšje nego fuštȃnov.
Kapotȋn o pȁna i buštȉne za cȉce držȁti,
prfȋn i ubȏjci ko je bude volja kopȁti.
Postȍlov basȅtih i na tȁci o kože i laka,
pe-šest pari kako principȅša.
Šuperbȁča, drži se, kako madrēbadȅša!
Škarpȉnov novih tȅker kurdelȃnih.
Nis ih brojila, na dno kȍfe ih je zabȉla.
Nȋ je to bilo dosta, kako da je bȗska
i da ima sto nog, nakrcȁla je u sakȅtac:
bȋgulice za poplȁti, nȁplate tri kvadrȅla,
za novi škarpȋni činȉti i ȕsanja za škofȗni pošivȁti.
Prtrȅsla je cȇlu kucu i vazȅla
muškȏ i žȅnsko kopȉto za činiti obȕću.
Čȕdo bjankarȉje i robe pȑtene
ponile su je divojke napȑćene.
Trȅse kȏf su na glavȁmi nosȉle,
kako da su z tȑganja hodȉle.
- Ča si fermȁla, oli ni više čȃ imala?
- Da imala? Ćȗti:
Dva tapeȅja kȃna na mȍdre i črljȅne rȋge.
I jenȏga dugaškȍga z kraja na kraj kȁmare,
novoga z butȋge.
- Govori se najvȉšja dȍtarica dosȅle.
- Je! Je, je moja sȇle, još imaš ča čuti:
Kolȃjnu o zlata za tri puta kȍlo vrȃta.
Vitȉcu i tri prstena zlȃtna.
Puntapȅt, brunculȅt , ča je je dala sȃntula o Grada.
Rećȋni z pȉnduljima za se naprlitȁti,
i moretȉne za uši probijȁti.
Dvi kȁnice kȃne, svaka drugih kolȗrov,
Duzȋnu žmȗlov.
Kudȉlju , bretenȃ, prsukovȁlo, kanȏl za zȁpas zadȉti,
ka pletȇ na igle debele i tȃnke, kih ni zaboravila vȑći.
Kartȅlicu ȋgal mȃlih i velih, kvadrenjȁču i šȉlo
(u gujȉcu je se dobȏvda zabȉlo).
Žȋžjal, drȅtve i vȍska za pošivȁti.
Ma ki će sve znati?
Dvanȃjst rokȅlov konca crnoga i bȅloga za na ruke
i za na mȁkinu šiti, mogla bi šalturȉca biti.
Çȅse maceȇt bumbaȃka, dvȃjse kudȉljic vune,
bȇle, sȗre i cȑne.
Svake šȏrte gomeȅtulov za rekamivȁti,
da ima čȃ činiti ka se s polja vȑne.
Mȁkinu za šiti na ruke,
a mȍre ju i na noge impjantȁti.
Tri ȍvčine žive i sȅdan ubijenih za pir.
To još niko ni vidi živ.
- Tolika ingordȋžija?
- Pokupila je i čavli z kuće,
a dȍmaka su ostali prez obuće.
Sa ćuti vȍ:
Njivu u polju i dvȃjse stȗpov.
- Ma ča mi govoriš?
- Particȅlu na Grpȃšćak i drvȃšćak.
Kosȋr za brime i kiće brati.
Spȁru šȃru o kȑpic za na glavu
kȁbli vode nositi i drugu o suknȅne bičve
za spo brimeȇn vȑći.
Komȍ bȁso na četire kašȅte
i visoko na šest za bjankarȉju uštivȁti.
Ćȉkarice vele i male za na komȍ poštivȁti.
Štrȉke rekamȃne za na komȍ i škabȅli.
Koltrȋne za na cȁkla,
I vele za bonegrȁcije, do tlohȁ.
Baȗl i skrȉnju za suknenu robu držȁti.
Moraće ih u kamarȋn kacȁti.
Pȍnila je i bȃnčić za u crikvu,
prfȋn i svoju zikvu,
a ki zna će li dice imati.
Sekȑva je parićȁla armerun i škabȅli,
koćȅtu bašćȃnsku i pajarȉcu,
kozice o janjcov za pod dicu.
Štramcȉ o vune, vȑčinu, kȃin i brȍku
o majȍlika, na levamȃnu.
- Ja ti kȃžen da će imati dobrȋn kȁmaru prkrcȃnu.

Sale, na Dan sv. Ane 1994.

{| class="wikitable" |+MANJE POZNATE SALJSKE RIČI U DȌTARICI: |- |bȃnčić || mala niska drvena klupica |- |baȗl || drveni sanduk za držanje rublja |- |bȅna || glupak, budala |- |bȉgulica || juneća štavljena koza za potplate |- |bjankarȉja || rubenina, posteljina |- |bonégrȁcije || nosac zavjesa |- |branculȅt || narukvica |- |brȍka || posuda za cistu vodu na umivaoniku |- |bȗska || smrdljiva stonoga |- |buštȋna || starinski ženski prsluk |- |capȅla || potpetena obuća (capelati) |- |cȉc || vrsta tankog platna |- |črvljȅno || obojeno |- |ćȉkarica || šalica za crnu kavu |- |drvȃšćak || konop za drva |- |faceletlȗn || veliki vuneni šal |- |fuštȃn || naborana starinska suknja |- |fuštȁnj || vrsta platna, flanel |- |gomȅtul || klupko konca |- |imbotȋda || poplun, jorgan |- |inkašȃno || umetnuta čipka kroz jastučnicu |- |intimȅla || jastučnica |- |kaȋn || lavor, umivaonik |- |kȁmara || soba |- |kamarȋn || sobičak |- |kambrȉk || pamučno platno dizajnirano |- |kanavȁca || kuhinjska krpa |- |kȁnica || otkani pojas od vune |- |kanȏl || drveni držač igle za pletenje |- |kapotȋn || ženski kratki kaputić |- |kȉće || posječeno zeleno granje za stoku |- |koćȅta || braćni krevet (bašćanska postilja) |- |kolȃjna || lančić, ogrlica |- |koltrȋne || zavjese, zastori |- |komȍ || komoda, onizak ormar za rublje |- |kosȋr || mala, ručna zaobljena sjekirica |- |kȍžica || suha janjeća kožica |- |kudȉljica || smotana očešljana vuna za predenje |- |kurdȅla || vrpca |- |kurdelȁti || obrubiti vrpcom |- |kušȋn || jastuk |- |kvadrenjȁča || velika igla sa širokim ušicama |- |levamȃn || umivaonik |- |lancȗn || plahta |- |ligȃmbi || podvezice za čarape od laštika |- |luzȃri || ruže, cvjetovi |- |madrebādȅša || priorica samostana |- |madrepȍlam || tanko svilenkasto platno |- |macȅta || smotak, namotaj |- |majȍlika || porculan, keramika |- |mȁkina || šivači stroj |- |mȇrlić || čipka |- |mȉga || uzrečica: nipošto |- |moretȋna || naušnica s likom crnkinje |- |mudȃnte || gaće, gaćice |- |nȁplata || štavljena koža za gornji dio obuće |- |naprlitȁti || iskititi, uresiti |- |nažuntȁti || nadodati, dodati |- |očȑvljeno || obojeno |- |pajarȉca || slamarica |- |parićȁti || spremiti |- |particȅla || parcela, čestica |- |perušȉne || perje |- |pijumȋn || pokrivač od perja, perina |- |pȉndulji || privjesci |- |pȍdveze || vezice za čarape |- |prfȃn || čak |- |principȅša || princeza |- |prsukovaȁlo || vreteno za sukanje vune |- |pršȏna || jedna osoba (misli se na krevet) |- |prtȅno || platneno, pamučno |- |puntapȅt || broš |- |rȅkam || izrađen vezom |- |renćȋni || naušnice |- |rokȇl || kalem konca |- |sȃntula || kuma |- |spȁra || podmetač na glavi za nošenje tereta |- |stȋnji || končani privjesci |- |šalturȉca || krojačica |- |šatȇn || saten, crna tkanina za fustane |- |šćavȋna || mekani vuneni pokrivač |- |šjȃlpa || šal, plet |- |škarpȋni || domaća obuća |- |špȗnja || frotir |- |škabȇl || noćni ormarić |- |štramȁc || madrac |- |štrȉka || izrađeni podmetać, za stolice i ormariće (stolnjak) |- |šuperbȁča || oholica, gizdava, uznosita |- |tȉbit || tibet crno platno za fustane |- |travȇrsa || pregača |- |ȕbojci || seljačka obuća prišivena na vunene čarape |- |ȕsanje || štavljena koža za potplate (od vola) |- |valȇnca || gunj, vuneni tkani pokrivač |- |vitȉca || vjenčani prsten, vera |- |vȑčina || noćna posuda |- |žižjȃl || naprstak |- |žvȅlto || hitro, brzo |}